నమ్మకాలు

నాకు తెలుసు నువ్వు ఈ ప్రశ్న అడుగుతావని !!
ప్రతిదానికి ఋజువులు కావాలంటే ఎలా !!
భౌతిక అనుభూతులకు అందని
మానసికానుభూతులు అలా తెలుస్తూనే ఉంటాయి
ఇప్పుడు ఇది ఇలా అనే సిద్దాంతీకరణ చెయ్యలేను
అది అంతా మాయే అనే వేదాంతీకరణ చెయ్యలేను
ఉన్నదున్నట్లు అనుభవించటం తప్ప
తర్క మీమాంసలకు తావెందుకు ??
ఎలా సూత్రీకరించాలా అనే అలోచనెందుకు ??
చెరువులో చేపపిల్ల ఈదిన జాడలు కనిపిస్తాయా !!
నీతో పాటే నడిచే నీడ అడుగులెక్కడో తెలుస్తాయా !!
సరుగుడు చెట్ల మధ్య గాలి ధ్వని విని
అది ద్వంసగీతం అనుకుంటామా !!
దూకే జలపాతాల హోరు విని
అది ఉత్సాహం అనుకోగలమా !!!
ఎప్పటికయ్యది అప్పటికి అనుకుంటూనే
కాలం, దాన్నంటే జీవితం సాగుతుంటాయి
ఏవి కంటికి కనిపించవు, వినిపించవు
అయినా నీకు తెలుస్తూనే ఉంటుంది
నువ్వు ప్రతిస్పందిస్తూనే ఉంటావు

అసలు అన్నీ తెలుసుకున్నాక ఇంకా ఈ ఋజువుల భాషెందుకు ??
మనసులో ఉన్న భావనలకు మనుషుల సాక్ష్యాలెందుకు??
ప్రవాహాల్లో ఎక్కడైనా పాతనీరు చూడగలమా
వీచేగాలిలో ఎప్పుడైనా పురాగంధాన్ని ఆస్వాదించగలమా !!
కాలం ఎప్పుడూ నిత్యనూతనమే !
ప్రతిక్షణాన్ని గతక్షణంతో సంధానిస్తూ
భవిష్యత్తులోకి సాగిపోవాల్సిందే కదా !!
నువ్వైనా, నేనైనా ఈ సంధికాలాని కట్టుబడ్డ
గడ్డిపోచలమే కదా !!
ఉన్నది ఉన్నట్లుగా అనందిద్దాం
లేనిది లేనట్లుగా వదిలేద్దాం
నిజాన్ని నమ్మనంతవరకు అబద్దమే
అబద్దం నమ్మినంతవరకు నిజమే
నిజానిజాలు చూసే కోణాలను బట్టి మారుతూనే ఉంటాయి
నమ్మకాలు ముఖ్యంకానీ, నిజాలు కానే కాదు.
ఎప్పుడైనా సత్యాసత్యాలు క్షణికాలు
నమ్మకాలు మాత్రమే శాశ్వతాలు.
నమ్మాల్సింది మనసునే కానీ
మనుషులను కాదు.