ఇంతకు ముందు అక్కడ నల్లటి త్రాచు
లాంటి రోడ్డుండేది. వానొచ్చింది
పాము వెళ్ళిపోయింది కుబుసాన్ని
రాళ్ల సందున వదిలేస్తూ.
ఆ రాళ్లపై కాళ్ళు మోపి
ఇరుకులో పరిగెడుతుంది
మనుషులను మోసుకొని
ఒకరి భుజాల మీద మరొకరినెత్తుకొని
అసలైన సామ్యవాదానికి,
సిసలైన అర్దం చెబుతూ
గుంతలను దాటుకుంటూ
చెంగు చెంగున దూకుతుంటుంది
ఇప్పుడు అందరూ స్వేదం కక్కాల్సిందే
అత్తరులా ఒకరికొకరు పూసుకోవాల్సిందే
దాని వేగాన్ని రాకెట్లూ అందుకోలేవు
ఏ టెక్నాలజి పట్టుకోలేదు
తొమ్మిదో నెల పురిటినెప్పులు ఎనిమిది నెలలకే
అరవై ఏళ్ళ వెన్నునెప్పులు ముప్పై ఏళ్లకే
వచ్చేంత చండ ప్రచండ వేగం
పురాణాలలో నుండి పట్టణాలలోకి
పరుగెత్తుకుంటూ వచ్చిన పుష్పకవిమానం
తనకు సరిపోకపోయినా ఎప్పుడూ
మరొక అతిధికి ఆహ్వానం పలికే సత్సంప్రదాయం
అదే మన భాగ్యనగర ఆటో ప్రయాణం
కంటికి కన్పడేలా వర్ణించారు పుష్పక విమానాన్ని..
రిప్లయితొలగించండికృతజ్ఞతలు అంబరీష గారు
తొలగించండి