ఎవరునువ్వు

ఎవరు నువ్వు ?
హిందువువా ? ముస్లింవా ? క్రైస్తవుడివా ? ఏ మతం ?
అగ్రకులం వాడివా ? నిమ్న కులం వాడివా ? ఏ కులం ?
ఆంధ్రవాడివా ? తెలంగాణా వాడివా ? ఏ ప్రాంతం
ఉద్యోగివా ? నిరుద్యోగివా? చిరుద్యోగివా ? ఏం చేస్తావు
నువ్వు ఖచ్చితంగా మనిషివైతే కావు
ఇక్కడ మనుషులెవరు లేరు
ముసుగులు తప్ప,
అందుకే ఏదో ఒక ముసుగు తొడుక్కో
ఏ ముసుగు లేదా ?
అయితే నువ్విక్కడ ఉండొద్దు
ఇక్కడ ముసుగులేక ప్రవేశం లేదు
ప్రవేశంతోనే ఏదో ఒక ముసుగు తప్పదు
చీకటి గర్బం నుండి బయటకు రాగానే
మరో చీకటి ముసుగువేసుకోక తప్పదు
వెలుతురు తట్టుకోలేవు మరి
ఉండిపో ! చీకట్లో ! ముసుగులో !
నీ ముసుగు నువ్వు కూడా ఎంచుకోలేవు
నీ పుట్టుకే ఎంచి మరీ ఇస్తుంది ఓ మంచి మసుగు
అయినా బుద్దిజీవి నంటావు,
నీ ముసుగు తీసుకోవటం రాదు
బుద్దిలేదూ చెప్పుకోవటానికి బుద్ది జీవినని
బుద్దిలేని బుద్ద జీవివి
ముసుగు అద్దంలో చూసుకొని
నువ్వెవరో చెప్పు
నేను లెక్కరాసుకోవాలి