రైతు బ్రతుకు

రైతన్నకి పెద్దగా
పని లో తేడా రాలేదు, కాకపోతే హోదాలో
అప్పుడు కళ్లం దగ్గర కాపలా
ఇప్పుడు గుమ్మం దగ్గర కాపలా
అప్పుడు ఇంటికొచ్చిన వారికి మర్యాదలు ఇంటాయన హోదాలో
ఇప్పుడు ఆఫీసుకొచ్చిన వారికి మర్యాదలు పనాయన హోదాలొ
అప్పుడు పైరు కొయ్యటానికి వంగాడు
ఇప్పుడూ జీతం తీసుకొవటానికి వంగాడు
అప్పుడు కట్టింది మాసిన పంచయినా మర్యాదే
ఇప్పుడు కట్టింది ఇస్త్రీ చేసిన ప్యాంటయినా అమర్యాదే
అప్పుడు పేరు మోతుబరి
ఇప్పటి పేరు సెక్యూరిటి
అప్పటి ముఖంలో సంతోషం
ఇప్పటి ముఖంలో నైరాశ్యం
ముఖం మారలేదు కాని ముఖ చిత్రం మారిపోయింది
కొత్త కొత్త సెజ్ ల పాదాల కింద పాపం పంట నలిగిపోయింది
వ్యవసాయం తప్ప సాయం ఆడగని చేతులు
చేష్టలుడిగి చూస్తున్నాయి
ఇది ఆధునిక రైతు బ్రతుకు చిత్రం
అన్నం పండించే రైతుకే అన్నం లేకపోవటం మహా చిత్రం